«Ուրարտուն» նվաճեց Կոնֆերենցիաների լիգայի հաջորդ փուլի ուղեգիր

Կոնֆերենցիաների լիգայի որակավորման առաջին տուրի պատասխան խաղում «Ուրարտուն» տանն ուժեղ գտնվեց «Կալև Տալինից»։

Վազգեն Սարգսյանի անվան «Հանրապետական» մարզադաշտում երևանյան ակումբը 2 անպատասխան գնդակ ուղարկեց էստոնական ակումբի դարպասը։

Թիմերի միջև կայացած առաջին խաղում Դմիտրի Գունկոյի սաները 2։1 հաշվով հաղթանակի էին հասել։ Պատասխան խաղում Միքայել Միրզոյանի դուբլը կրկին հաղթանակ պարգևեց «Ուրարտուին»։ 12-րդ րոպեին հայ կիսապաշտպանը առաջ մղեց իր թիմին։ Առաջին խաղակեսի վերջում (45՛) Միրզոյանը երկրորդ գնդակն ուղարկեց մրցակցի դարպասը։ Ընդհանուր դիմակայությունում «Ուրարտուն» 4։1 (2:1, 2:0) հաշվով հաղթեց «Կալև Տալինին»։

Կոնֆերենցիաների լիգայի որակավորման փուլի երկրորդ փուլում «Ուրարտուն» կմրցի չեխական «Բանիկ Օստրավայի» դեմ։ Առաջին հանդիպումը հուլիսի 25-ին է, պատասխան հանդիպումը՝ օգոստոսի 1-ին։