«ԱրմՌոբոտիքս 2021»․ հայ պատանիների մտքի արդյունքը՝ ինժեներական փաթեթավորմամբ

 «ԱրմՌոբոտիքս 2021» ինքնակառավարվող ռոբոտների Հայաստանի 13-րդ առաջնությանն աննախադեպ թվով՝ 180 թիմ մասնակցության հայտ էր ներկայացրել։ Եզրափակիչ փուլ անցած 44 թիմերից դեկտեմբերի 12-ին հայտնի դարձան լավագույնները։

10-13 և 14-17 տարեկանների տարիքային խմբերում մրցող թիմերից առաջին փուլը հաղթահարեցին վեցական թիմ։ Դպրոցական թիմերի պատրաստած ռոբոտներին «Խելացի քաղաք»-ում շրջելու և իրենց ունակությունները դրսևորելու համար ութ րոպե ժամանակ էր տրված։ Այդ ընթացքում  նրանք  պետք է արձագանքեին գազի արտահոսքին, մարեին քաղաքում բռնկված հրդեհը, դատարկեին աղբամաններն ու հետիոտնային անցումով անսխալ անցնեին։

Եզրափակչի երկրորդ փուլ անցած թիմերից 10-13 տարեկանների տարիքային խմբում առաջին հորիզոնականը զբաղեցրեց Էջմիածնի թիմը, երկրորդը՝ Այգուտի, իսկ երրորդը՝ Գեղարքունիքի թիմերը։ Առաջին պատվավոր տեղը զբաղեցրած էջմիածինցիները, բացի դրամական պարգևից, մրցանակներ ստացան նաև «Թիմ Տելեկոմ Արմենիա»-ի կողմից։

14-17 տարեկանների տարիքային խմբում ներկայացված թիմերից ժյուրին դժվարությամբ, բայց փորձեց ամենաարժանավորներին ընտրել։ Այս տարիքային խմբում լավագույնները Գանձակի դպրոցի աշակերտներն էին։ Համանուն թիմը, բացի դրամական մրցանակից՝ 550 հազար դրամ, ու «Թիմ Տելեկոմ Արմենիա»-ի մրցանակներից, ստացավ նաև փոխանցիկ գավաթը։